SN 22.6 (S iii 15)
Paṭisallāṇa Sutta
— Seclusion —
[paṭisallāṇa]

The Buddha exhorts his followers to practice seclusion so that they can practice insight into the arising and passing away of the five aggregates, after which he defines what he means by arising and passing away of the aggregates, in terms of dependent origination.



Notes:
1) you can test here your general level of understanding if you have read the preceding sutta carefully
2) There are a few bubbles on the "underdotted" words.
3) the Pali-English Dictionary is available here


evaṃ me sutaṃ: ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme.{n} tatra kho bhagavā bhikkhū āmantesi:

– bhikkhavo ti.

– bhadante ti te bhikkhū bhagavato paccassosuṃ. bhagavā etad·avoca:

paṭisallāṇe, bhikkhave, yogam·āpajjatha. paṭisallīṇo, bhikkhave, bhikkhu yathābhūtaṃ pajānāti. kiñ·ca yathābhūtaṃ pajānāti? rūpassa samudayañ·ca atthaṅgamañ·ca, vedanāya samudayañ·ca atthaṅgamañ·ca, saññāya samudayañ·ca atthaṅgamañ·ca, saṅkhārānaṃ samudayañ·ca atthaṅgamañ·ca, viññāṇassa samudayañ·ca atthaṅgamañ·ca.

ko ca, bhikkhave, rūpassa samudayo? ko vedanāya samudayo? ko saññāya samudayo? ko saṅkhārānaṃ samudayo? ko viññāṇassa samudayo? idha, bhikkhave, bhikkhu abhinandati abhivadati ajjhosāya tiṭṭhati.

kiñ·ca abhinandati abhivadati ajjhosāya tiṭṭhati? rūpaṃ abhinandati abhivadati ajjhosāya tiṭṭhati. tassa rūpaṃ abhinandato abhivadato ajjhosāya tiṭṭhato uppajjati nandī. yā rūpe nandī tad·upādānaṃ. tass·upādāna·paccayā bhavo; bhava·paccayā jāti; jāti·paccayā jarā·maraṇaṃ soka·parideva·dukkha·domanass·upāyāsā sambhavanti. evam·etassa kevalassa dukkha·kkhandhassa samudayo hoti.

vedanaṃ abhinandati abhivadati ajjhosāya tiṭṭhati. tassa vedanaṃ abhinandato abhivadato ajjhosāya tiṭṭhato uppajjati nandī. yā vedanāya nandī tad·upādānaṃ. tass·upādāna·paccayā bhavo; bhava·paccayā jāti; jāti·paccayā jarā·maraṇaṃ soka·parideva·dukkha·domanass·upāyāsā sambhavanti. evam·etassa kevalassa dukkha·kkhandhassa samudayo hoti.

saññaṃ abhinandati abhivadati ajjhosāya tiṭṭhati. tassa saññaṃ abhinandato abhivadato ajjhosāya tiṭṭhato uppajjati nandī. yā saññāya nandī tad·upādānaṃ. tass·upādāna·paccayā bhavo; bhava·paccayā jāti; jāti·paccayā jarā·maraṇaṃ soka·parideva·dukkha·domanass·upāyāsā sambhavanti. evam·etassa kevalassa dukkha·kkhandhassa samudayo hoti.

saṅkhāre abhinandati abhivadati ajjhosāya tiṭṭhati. tassa saṅkhāre abhinandato abhivadato ajjhosāya tiṭṭhato uppajjati nandī. yā saṅkhāresu nandī tad·upādānaṃ. tass·upādāna·paccayā bhavo; bhava·paccayā jāti; jāti·paccayā jarā·maraṇaṃ soka·parideva·dukkha·domanass·upāyāsā sambhavanti. evam·etassa kevalassa dukkha·kkhandhassa samudayo hoti.

viññāṇaṃ abhinandati abhivadati ajjhosāya tiṭṭhati. tassa viññāṇaṃ abhinandato abhivadato ajjhosāya tiṭṭhato uppajjati nandī. yā viññāṇe nandī tad·upādānaṃ. tass·upādāna·paccayā bhavo; bhava·paccayā jāti; jāti·paccayā jarā·maraṇaṃ soka·parideva·dukkha·domanass·upāyāsā sambhavanti. evam·etassa kevalassa dukkha·kkhandhassa samudayo hoti.

ayaṃ, bhikkhave, rūpassa samudayo; ayaṃ vedanāya samudayo; ayaṃ saññāya samudayo; ayaṃ saṅkhārānaṃ samudayo; ayaṃ viññāṇassa samudayo.



ko ca, bhikkhave, rūpassa atthaṅgamo? ko vedanāya atthaṅgamo? ko saññāya atthaṅgamo? ko saṅkhārānaṃ atthaṅgamo? ko viññāṇassa atthaṅgamo? idha, bhikkhave, n·ābhinandati n·ābhivadati n·ājjhosāya tiṭṭhati.

kiñ·ca n·ābhinandati n·ābhivadati n·ājjhosāya tiṭṭhati? rūpaṃ n·ābhinandati n·ābhivadati n·ājjhosāya tiṭṭhati. tassa rūpaṃ an·abhinandato an·abhivadato an·ajjhosāya tiṭṭhato yā rūpe nandī sā nirujjhati. tassa nandī·nirodhā upādāna·nirodho; upādāna·nirodhā bhava·nirodho; bhava·nirodhā jāti·nirodho; jāti·nirodhā jarā·maraṇaṃ soka parideva dukkha domanass·upāyāsā nirujjhanti evam·etassa kevalassa dukkha·kkhandhassa nirodho hoti.

vedanaṃ n·ābhinandati n·ābhivadati n·ājjhosāya tiṭṭhati. tassa vedanaṃ an·abhinandato an·abhivadato an·ajjhosā tiṭṭhato yā vedanāya nandī sā nirujjhati. tassa nandī·nirodhā upādāna·nirodho; upādāna·nirodhā bhava·nirodho; bhava·nirodhā jāti·nirodho; jāti·nirodhā jarā·maraṇaṃ soka parideva dukkha domanass·upāyāsā nirujjhanti evam·etassa kevalassa dukkha·kkhandhassa nirodho hoti.

saññaṃ n·ābhinandati n·ābhivadati n·ājjhosāya tiṭṭhati. tassa saññaṃ an·abhinandato an·abhivadato an·ajjhosāya tiṭṭhato yā saññāya nandī sā nirujjhati. tassa nandī·nirodhā upādāna·nirodho; upādāna·nirodhā bhava·nirodho; bhava·nirodhā jāti·nirodho; jāti·nirodhā jarā·maraṇaṃ soka parideva dukkha domanass·upāyāsā nirujjhanti evam·etassa kevalassa dukkha·kkhandhassa nirodho hoti.

saṅkhāre n·ābhinandati n·ābhivadati n·ājjhosāya tiṭṭhati. tassa saṅkhāre an·abhinandato an·abhivadato an·ajjhosāya tiṭṭhato yā saṅkhāresu nandī sā nirujjhati. tassa nandī·nirodhā upādāna·nirodho; upādāna·nirodhā bhava·nirodho; bhava·nirodhā jāti·nirodho; jāti·nirodhā jarā·maraṇaṃ soka parideva dukkha domanass·upāyāsā nirujjhanti evam·etassa kevalassa dukkha·kkhandhassa nirodho hoti.

viññāṇaṃ n·ābhinandati n·ābhivadati n·ājjhosāya tiṭṭhati. tassa viññāṇaṃ an·abhinandato an·abhivadato an·ajjhosāya tiṭṭhato yā viññāṇe nandī sā nirujjhati. tassa nandī·nirodhā upādāna·nirodho; bhava·nirodhā jāti·nirodho; jāti·nirodhā jarā·maraṇaṃ soka parideva dukkha domanass·upāyāsā nirujjhanti evam·etassa kevalassa dukkha·kkhandhassa nirodho hoti.

ayaṃ, bhikkhave, rūpassa atthaṅgamo, ayaṃ vedanāya atthaṅgamo, ayaṃ saññāya atthaṅgamo, ayaṃ saṅkhārānaṃ atthaṅgamo, ayaṃ viññāṇassa atthaṅgamo ti.



Bodhi leaf